MOST стварылі беларускія журналісты ў вымушанай эміграцыі на пачатку 2022 года. Усяго за год каманда выпусціла некалькі сотняў тэкстаў і дзясяткі відэаінтэрв’ю, аб’яднала журналістаў і беларускую дыяспару ў Беластоку, запусціла ўласную медыяшколу і нават арганізавала курсы SEO-маркетынга. Падрабязнасці Прэс-клуб даведаўся ў Руслана Кулевіча – стваральніка і галоўнага рухавіка MOST.
– MOST паўстаў дзякуючы праекту Media Port Belarus, які спачатку з’явіўся ў Варшаве, а потым у Беластоку. Сюды з’ехаліся журналісты з розных гарадоў – Гродна, Маладзечна, Мінска, Брэста – якія страцілі працу ў Беларусі. Мы аб’ядналіся і стварылі праект пад назвай MOST. Гэтая назва адлюстроўвала нашу місію – быць інфармацыйным мостам паміж Гродна і Беластокам, а таксама мостам паміж этнічнымі беларусамі Беластока (а гэта каля 40 тысяч) і тымі, хто прыехаў сюды пасля 2020-га. Але пасля таго, як наш рэсурс прызналі «экстрэмісцкім», мы трохі скарэктавалі вектар, бо ў нас «адрэзалі» аўдыторыю з Беларусі. Мы ўзялі за мэту стаць асноўным медыя для беларусаў, якія пераязджаюць у Польшчу: рабілі самыя розныя гайды (як зрабіць PESEL, як адкрыць візу, як перавезці хатнюю жывёлу і гэтак далей).
Фота з асабістага архіву Руслана Кулевіча
Відэапраекту «Мы вернемся» ўжо два гады. Ён з’явіўся яшчэ да MOST, у ім – гісторыі палітвязняў і людзей, якія былі вымушаныя з’ехаць з Беларусі. А праграму «Беларусы могуць» мы запусцілі нядаўна і ў ёй будзем распавядаць пра паспяховыя гісторыі беларусаў, якія распачынаюць свой бізнес ў замежжы.
Мы разумеем, што людзі стаміліся ад палітыкі, таму хочам зрабіць нешта карыснае і ў той жа час пазітыўнае. На канале ўжо ёсць два выпускі: пра беларуса, які адкрыў фудтрак і робіць адны з самых смачных бургераў у Беластоку, а другі – пра беларуску, якая кіруе СТА, таксама тут, у Беластоку.
Зараз мы рыхтуем яшчэ адзін відэапраект: будзем дапамагаць 70-гадовай беларусцы рабіць свой YouTube-канал, дзе яна раскажа пра жыццё беларускага пенсіянера ў эміграцыі. Маладым людзям лягчэй пераехаць, а як эміграцыю перажываюць людзі сталага ўзросту? Дзе шукаць працу, жыллё?
Яшчэ плануем запусціць школу ютубераў у нашым каворкінгу. Таму вось гэты праект (пра жыццё за 70), калі ўсё атрымаецца, спадзяемся, будзе добрым прыкладам для школы.
Дзякуючы Прэс-клубу і таму, што тут у Беластоку з’явілася шмат добрых медыяспецыялістаў – і відэааператараў, і мантажораў, і прадусараў, і журналістаў з досведам, – летась мы паспяхова правялі школу журналістыкі. Атрымалі каля 30 заявак. Навучанне доўжылася тры месяцы, паспяхова скончылі школу 12 чалавек. Удзельнікі былі самага рознага ўзросту (ад 15 да 55 гадоў) і з розных сфер дзейнасці.
Фота з асабістага архіву Руслана Кулевіча
Ужо ёсць і першыя практычныя вынікі школы: дзве дзяўчыны запусцілі ўласны падкаст «Гэта мы», у якім распавядаюць пра жыццё беларускіх жанчын у Польшчы.
Яшчэ адна выпускніца медыяшколы пачала супрацоўнічаць з MOST у якасці SMM-менеджара і таргетолага. Адзін з выпускнікоў таксама плануе запусціць радыё на MOST, а самая маладая ўдзельніца школы хоча стварыць свой падкаст пра падлеткаў.
Пасля выпуску медыяшколы мы адразу распачалі курсы SEO-маркетынга для журналістаў. Мы дапамагалі аднаму палітвязню с Гродна, а ён наўзамен вырашыў падтрымаць беларускіх журналістаў і падзяліцца сваімі прафесійнымі навыкамі і ведамі. Ён са сваім калегам два разы на тыдзень прыходзіць у наш каворкінг і праводзіць навучанне, распавядае, як выводзіць матэрыялы ў топ пошукавых сістэм, як лепш прасоўваць артыкулы.
Фота з асабістага архіву Руслана Кулевіча
Па-за медыяпляцоўкай мы яшчэ ладзім прабежкі: разам з чытачамі выходзім у горад і бегаем. У мінулым годзе мы да таго ж прабеглі эстафету (усе ўдзельнікі былі ў цішотках MOST), а яшчэ другі год запар 1 студзеня арганізавалі «Забег цвярозасці». Хутка ў Варшаве будзе праходзіць паўмарафон, на ім у цішотцы з беларускімі палітзняволенымі журналістамі пабяжыць журналістка MOST Таццяна.
Фота з асабістага архіву Руслана Кулевіча
Мы вырашылі прысвяціць гэты год прафесійнай адукацыі, бо летась больш працавалі з дыяспарай. Да 2023 года ў Беластоку не было месца, дзе магла б збірацца беларуская дыяспара, таму такім месцам мы зрабілі наш каворкінг. Ён быў кропкай прыцягнення беларусаў у Беластоку: да нас прыходзілі пісаць лісты палітвязням, ладзілі шмат сустрэч і імпрэз. Але ў пачатку 2023 года ў Беластоку адкрыўся хаб «Новая зямля», і цяпер там збіраецца дыяспара. Мы вельмі радыя, што распачалі гэтую справу, што дыяспара разрастаецца і ёй патрабуецца больш месца. А мы цяпер сканцэнтруемся на журналістыцы і адукацыі.
Што тычыцца планаў MOST, то я хацеў бы, каб мы сталі асноўным медыя беларусаў у Польшчы. Але калі прыйдзе час вяртацца на радзіму, я хацеў бы, каб MOST працаваў і ў Гродна, і ў Беластоку, каб ён быў сапраўдным мостам – паміж Гродна і Беластокам, і шырэй – паміж Беларуссю і Польшчай.
Кожны тыдзень атрымлівай на пошту: якасныя магчымасці (гранты, вакансіі, конкурсы, стыпендыі), анонсы івэнтаў (лекцыі, дыскусіі, прэзентацыі, прэс-канферэнцыі) і карысны кантэнт
