Мэта даследавання БАЖ — прааналізаваць існуючую нарматыўную базу, якая рэгулюе выкарыстанне штучнага інтэлекту, у тым ліку ў медыясферы, разгледзець міжнародныя практыкі і выявіць ключавыя выклікі для правапрымянення.
Палітычная сістэма Беларусі з яе аўтарытарнымі метадамі кіравання шмат у чым вызначае падыход краіны да рэгулявання ШІ і фарміравання адпаведных норм. Цэнтралізаваны працэс прыняцця рашэнняў, уласцівы падобным рэжымам, прыводзіць да закрытасці і мінімальнага грамадскага ўдзелу ў распрацоўцы палітыкі ў сферы ШІ.
У такім асяроддзі штучны інтэлект можа выкарыстоўвацца пераважна ў мэтах сачэння і кантролю, пры гэтым пытанні этыкі, канфідэнцыйнасці і правоў чалавека адыходзяць на другі план. Гісторыя падаўлення іншадумства ў Беларусі паказвае на сур’ёзную рызыку таго, што тэхналогіі ШІ будуць актыўна прымяняцца для ўзмацнення магчымасцей дзяржаўнага назірання, што непазбежна прывядзе да далейшага абмежавання свабод.
Разуменне прававых аспектаў штучнага інтэлекту мае вырашальнае значэнне для захавання дэмакратычных інстытутаў і абароны правоў чалавека ў лічбавую эпоху. Гэты дакумент закліканы ўнесці ўклад у дыскусію аб будучыні рэгулявання ІІ, садзейнічаючы выпрацоўцы ўзважаных рашэнняў, якія дадуць магчымасць выкарыстоўваць тэхналогіі на карысць грамадства, не дапускаючы парушэнняў правоў і свабод грамадзян.
Дакумент складаецца з некалькіх ключавых раздзелаў. У першым раскрываецца прырода штучнага інтэлекту, апісаны сферы яго прымянення, падыходы буйных тэхналагічных кампаній да выкарыстання ШІ, этычныя стандарты, якія распрацоўваюцца міжнароднымі арганізацыямі. Наступны раздзел прысвечаны прымяненню ШІ ў журналісцкай дзейнасці, разгледжаны прыклады падыходаў да гэтага пытання на ўзроўні міжнародных арганізацый (Рада Еўропы) і рэдакцый буйных медыя.
Далей прадстаўлены агляд прававога рэгулявання ШІ ў міждзяржаўных аб’яднаннях (ЕС, СНД) і асобных краінах (Літва, Казахстан). У чацвёртым раздзеле прааналізаваны бягучы стан прававога рэгулявання ШІ у Беларусі і яго магчымыя перспектывы з улікам кантэксту, у якім адбываюцца гэтыя працэсы.
Завяршаюць дакумент рэкамендацыі медыясектару, грамадзянскай супольнасці і Рэспубліцы Беларусь па развіцці нарматыўнай базы, павышэнні празрыстасці алгарытмаў і ўкараненні прынцыпаў адказнага ШІ ў медыяіндустрыі.
Кожны тыдзень атрымлівай на пошту: якасныя магчымасці (гранты, вакансіі, конкурсы, стыпендыі), анонсы івэнтаў (лекцыі, дыскусіі, прэзентацыі, прэс-канферэнцыі) і карысны кантэнт
