Ідзе прыём заявак на прэмію для відэажурналістаў Hinzpeter Awards

Дэдлайн падачы заявак: 21 ліпеня 2023 года.

Hinzpeter Awards заснавана «Фондам 18 траўня» сумесна з Асацыяцыяй відэажурналістаў Карэі, каб выявіць і прыцягнуць увагу да відэажурналістаў, якія дэманструюць незвычайны журналісцкі дух у асвятленні дэмакратычных рухаў ва ўсім свеце.

На конкурс прымаюцца відэа, якія:

• адлюстроўваюць тэмы дэмакратызацыі і абароны правоў чалавека, у тым ліку навіны;
• былі ўпершыню паказаны на тэлебачанні і ў інтэрнэт-медыя ў перыяд з 1 чэрвеня 2022 года па 30 чэрвеня 2023 года;
• для пазаконкурснай катэгорыі няма абмежаванняў на час выпуску або трансляцыі.

Конкурсныя катэгорыі:

• The World at a Crossroads Award – прысуджаецца за найлепшае відэа з агульнага пулу матэрыялаў у катэгорыі «Навіны і артыкулы».
• Award for News – прысуджаецца за відэарэпартаж аб інфармацыйных падзеях, які засяроджаны на гісторыях, звязанай з тэмамі конкурсу.
• Award for Features – прысуджаецца за відэанавіны або дакументальныя фільмы відэажурналістаў, якія даюць магчымасць глыбей паглядзець на гісторыю, акрамя бягучых падзей, звязаных з тэмамі конкурсу.
• May Gwangju Award (пазаконкурсная катэгорыя) – прысуджаецца аднаму відэа (навіны, дакументальны фільм і г.д.) ад былога ці цяпер працуючага відэажурналіста, які ўнёс уклад у дэмакратыю, правы чалавека і мір.

Узнагарода ў памеры 10 000 долараў ЗША будзе прысуджана пераможцам у кожнай катэгорыі.

Хто можа падаць заяўку

Заяўкі прымаюцца ад відэажурналістаў, якія звязаныя з замежнымі або айчыннымі медыя.

Магчымы ўдзел каманд, колькасцю да трох асоб. У такім выпадку толькі кіраўнік каманды павінен указваць свае дадзеныя ў заяўцы, калі не пазначана іншае.

Спампаваць формы для заяўкі і даведацца больш пра ўмовы

З-за тэхнічных праблем загрузка файлаў праз сайт не працуе. Арганізатары просяць спампаваць усе формы і даслаць іх разам з неабходнымі дакументамі і відэа на электронны адрас hinzpeterawards@gmail.com.

У 2021 годзе ў намінацыі The World at a Crossroads Award перамогу атрымаў Міхаіл Аршынскі, які з 2009 года працаваў відэажурналістам тэлеканала «Белсат». Яго дакументальны фільм «Не бойся» (Don’t be afraid) расказвае пра беларусаў, якія ў 2020 годзе змагаюцца з дыктатурай за сумленныя выбары і супраць фальсіфікацыі. Фільм выйшаў у эфір у траўні 2021 года.

---