«Пісаў вершы для сына, каб захоўваць з ім сувязь». Выйшла ў свет кніжка журналіста-палітвязня Андрэя Скурко

Кожная старонка суправаджаецца тэматычнымі дзіцячымі ілюстрацыямі. Цікавае дапаўненне — QR-код у канцы кнігі, па якім можна паглядзець мультфільмы на вершыкі на YouTube-канале «Бэйбус».

— «Пра сланоў і барсучкоў» утрымлівае 65 вершыкаў, якія Андрэй стаў пісаць пару год таму, на патрэбу дзіцячага часопіса «Дуду». А пасля працягнуў пісаць для нашага сыночка, каб захоўваць сувязь з ім на адлегласці… Калі вершаў стала шмат, зрабілася ясна, што назбіралася ўжо цэлая кніжачка. Яго вершыкі сапраўды класныя: адначасова мілыя, добрыя і вясёлыя. Хто ведае Андрэя, ведае, што ён вясёлы, з фантастычным пачуццём гумару, і тут яму ўдалося прыстасаваць свой гумар для дзяцей. А сюжэты часта падказваем Андрэю мы — такі ў нас інтэрактыў, — распавядае жонка Андрэя Скурко Паўліна.

Па словах Паўліны, Андрэю вядома, што кніжка пабачыла свет, і яго гэта вельмі падтрымлівае ў няволі.

— Вершы Андрэя Скурко — скарб для дзіцячай літаратуры, бо налітыя любоўю і ўвагай да малых. Беларуская мова ў гэтых вершах — жывая і натуральная, бо пісаў іх чалавек, які думае па-беларуску і на гэтай жа мове гаворыць са сваім дзіцём, — каментуюць у выдавецтве «Тэхналогія».

Кіраўнік Беларускай Рады культуры Сяргей Будкін падкрэслівае, што выданне такой кнігі зараз — асаблівая падзея, і зборнік варты таго, каб быць у кожнай беларускай сям’і:

— Упэўнены, што ў будучыні кніга вершаў Андрэя Скурко стане класікаю беларускай дзіцячай літаратуры. Яна напісаная з вялікай любоўю цудоўнай беларускай мовай. Гэтыя вершы лёгка чытаюцца і запамінаюцца. Простымі словамі Андрэй піша пра самае галоўнае.

Набыць кнігу можна самавывазам у Мінску, а таксама з дастаўкай праз пошту па Беларусі і за мяжу.

Замовіць кнігу

Прэс-клуб

Ілюстрацыя на галоўнай: выдавецтва «Тэхналогія»

«Гэта ўсё мінецца, а мы застанёмся». Гісторыя «нашаніўца» Андрэя Скурко

 

---