Мінск, вул. Кісялёва, 12-2н, пам. 29
Стаць сябрам Меню Зарэзерваваць зал

З'явіўся каталог беларускіх падкастаў Belarus Podcast Hub

Стваральнікі камʼюніці радыёстанцыі Radio Plato Аляксандр Карняйчук і Павел Кірпакоў запусцілі свой новы праект – Belarus Podcast Hub. Цяпер увесь аўдыёкантэнт, звязаны з Беларуссю, будзе сабраны ў адным месцы.

Падкаставае асяроддзе ў Беларусі паволі шырыцца і насычаецца. У сеціве можна знайсці падкасты пра гісторыю, мову, ментальнае здароўе, IT, аўдыёгіды, паблік-токі і іншае. Але агульную карціну скласці складана: падкасты раскіданы па ўласных профілях і шукаць іх даволі цяжка. Каб аблегчыць жыццё слухачу, быў створаны каталог беларускіх падкастаў.

Апроч каталога, на сайце ёсць раздзел з артыкуламі. З іх чытачы даведаюцца як падрыхтавацца да інтэрвʼю, якое абсталяванне патрэбна на першым этапе, якія існуюць сусветныя трэнды і чаму варта рабіць відэаверсію падкастаў. Там жа можна будзе знайсці размовы з вытворцамі беларускіх падкастаў пра іх шлях да зорак.

Аўтары запрашаюць прадзюсараў падкастаў на Discord, дзе можна абменьвацца лайфхакамі, а таксама ствараць калабарацыі паміж падкастамі.

Мэта Belarus Podcast Hub – узмацніць падкаставае кам’юніці Беларусі, а таксама заахвоціць і падтрымаць жадаючых выпускаць свой медыйны прадукт у падкаст-фармаце.

«Асабіста я лічу, што ён [праект Belarus Podcast Hub] можа адыграць не апошнюю ролю ў сучаснай беларускай нацыятворчасці», – напісаў на сваёй старонцы ў Facebook Аляксандр Карняйчук.

Каталог яшчэ ў працэсе напаўнення, таму калі вашага любімага падкаста там няма, пішыце ў любым мэсэнджары праекту або на пошту editors@belaruspodcasthub.com.

Крыніца

Фота на вокладцы: Belarus Podcast Hub / Facebook

Партнёры прэс-клуба