Прэс-канферэнцыя, прысвечаная цырымоніі ўручэння прэміі імя Ежы Гедройця

Калі: 12 лістапада 2024 года

Удзельнікі прэс-канферэнцыі:

• Таццяна Нядбай – беларуская літаратарка, перакладчыца і праваабаронца, старшыня Беларускага ПЭНа – суарганізатара прэміі;
• Катажына Дрозд-Урбаньска – літаратуразнаўца, кандыдатка філалагічных навук, ад’юнкт кафедры беларусістыкі Варшаўскага ўніверсітэта, даследчыца беларускай літаратуры, сябра журы прэміі імя Ежы Гедройця за 2023 год;
• Сяргей Кавалёў – літаратуразнаўца, крытык, драматург, прафесар, загадчык кафедры славянскага літаратуразнаўства Універсітэта Марыі Кюры-Складоўскай у Любліне, сябра журы прэміі імя Ежы Гедройця за 2023 год.

Прэмія імя Ежы Гедройця – найбуйнейшая незалежная літаратурная ўзнагарода Беларусі, якая ўручаецца з 2012 года. Сярод лаўрэатаў мінулых сезонаў – Уладзімір Някляеў, Ігар Бабкоў, Ева Вежнавец. Летась галоўную ўзнагароду атрымала пісьменніца з Падляшша, журналістка тыднёвіка беларусаў у Польшчы «Ніва» Ганна Кандрацюк з кнігай «У прысценках старога лесу. Гісторыі людзей з Белавежскай пушчы». Сёлета цырымонія ўручэння прэміі адбудзецца 26 лістапада. журы трынаццаты раз вызначыць тры найлепшыя кнігі, напісаныя ў жанры мастацкай або дакументальнай прозы.

Цырымонія ўручэння Прэміі імя Ежы Гедройця пройдзе ў Гданьску ў Еўрапейскім цэнтры салідарнасці (Europejskie Centrum Solidarności, pI. Solidarności 1). На цырымоніі будуць агучаны вынікі конкурсу і адбудзецца ўзнагароджанне лаўрэатаў прэміі імя Ежы Гедройця. 25 і 26 лістапада пройдзуць сустрэчы з аўтарамі і аўтаркамі, дыскусія і кніжны кірмаш.

Падчас цырымоніі выступяць прадстаўнікі і прадстаўніцы беларускай і польскай культуры, адбудзецца прэм’ера буктрэйлераў да кніг фіналістаў і фіналістак, агучаных камандай прафесійных выканаўцаў аўдыявыдавецтваў «Кніжны воз» і «Audiobook.by». Беларуская спявачка і актрыса Дар’я Новік у суправаджэнні струннага аркестра выступіць з песнямі на вершы беларускіх палітвязняў, створанымі ў супрацы з кампазітарам Канстанцінам Яськовым. Вядоўца цырымоніі: Сяргей Падсасонны — журналіст і грамадскі дзеяч, вядоўца тэлеканала «Белсат».  Арганізатары прэміі —— Беларускі ПЭН і Міжнародны саюз беларускіх пісьменнікаў

Арганізатары цырымоніі ўзнагароджання:

• Беларускі ПЭН, Беларускае культурнае таварыства «Хатка»;
• Еўрапейскі цэнтр салідарнасці ў Гданьску;
• Міжнародны саюз беларускіх пісьменнікаў.

Партнёры падзеі: Аўдыявыдавецтвы «Кніжны воз» і «Audiobook.by». Праект фінансаваны ў рамках праграмы польскага супрацоўніцтва дзеля развіцця Міністэрства замежных спраў Рэспублікі Польшча.

З пытаннямі, датычнымі прэміі, звяртайцеся на пошту giedroyc@penbelarus.org

ЗАРЭГІСТРАВАЦЦА