Рэдакцыя KYKY: Мы чакаем замову на натыўную рэкламу ад сэкс-шопа!

У baj.by атрымаўся шыкоўны рэпартаж с нашай Адкрытай лятучцы з рэдакцыяй анлайн-часопіса KYKY.org, які мы і прадстаўляем вашай увазе. Тэкст і фота: Алена Ляшкевіч.

Рэдакцыя KYKY: Мы чакаем замову на натыўную рэкламу ад сэкс-шопа!

На адкрытай лятучцы ў Прэс-клубе рэдакцыя KYKY.org не давала парадаў, проста весела і жвава распавядала пра выданне. Але, калі задацца мэтай, то можна іх досвед трансляваць у лайфхак ды выкарыстаць наўпрост па прызначэнні.

Галоўная рэдактарка KYKY.org Наста Рагатка і дырэктарка выдавецтва "Мінт Медыя" Саша Раманава ў Прэс-клубе

Канечне, паўтарыць поспех KYKY можа толькі KYKY. Але тое-сёе спрацуе і ў іншых медыях. Калі на вашым сайце дасюль няма рубрыкі пра сэкс, яе трэба завесці. Найбольш праглядаў на KYKY набірае менавіта яна. Хаця там ёсць «Грошы», «Героі», «Праекты», «Месцы», «Культ»(ура) і «Боль» (экс-«Жыццё»). Не сказаць, каб рэдакцыя задаволеная такім станам рэчаў: «Калі з пяці тэкстаў у топе толькі два пра сэкс — гэта поспех».

Добрыя і кепскія навіны ад KYKY

Неістотна, успрымаюць ваша выданне як жоўтую прэсу ці як «разумны» часопіс, па-руску вы публікуецеся ці па-беларуску… Пра поспех артыкулаў пра сэкс нядаўна казаў і рэдактар «Нашай нівы» Ягор Марціновіч. Вунь і «Плэйбой» вярнуўся да публікацый з аголенымі прыгажунямі. Таму, калі хочаце быць чытаным выданнем, без сэксу — нікуды.

Кепская навіна: толькі на якасным кантэнце самаакупляльным выданнем не стаць. Трэба грошы ад рэкламы. Добрая навіна: натыўная рэклама можа чытацца не горш і нават лепш за звычайныя артыкулы.

Калі KYKY вырашыў выходзіць на самаакупляльнасць і стаў публікаваць больш натыўнай рэкламы, то рэдакцыя баялася страціць частку чытачоў. Але трафік наадварот павялічыўся. У прынцыпе, KYKY і так ніколі не замоўчваў назву брэндаў, не пужаючыся абвінавачванняў у рэкламе, і працягвае гэта рабіць у нерэкламных матэрыялах.

«Натыўная рэклама аздараўлівае журналіста, — кажа Саша Раманава, дырэктарка выдавецтва «Мінт Медыя», што цяпер яднае KYKY і беларускі The Village. — Гэта лепш, чым выдумляць навіны з канапы, а калонкі з галавы». Жаданне максімальна наблізіць натыўную рэкламу да звычайнага рэдакцыйнага кантэнту, па словах Аляксандры Раманавай, “прымушае варушыць мазгамі”. Напрыклад, рэкламуючы прадукцыю МакДональдс, яны разам з рэдактаркамі Анастасіяй Рагатка (KYKY.org) і Яўгеніяй Сугак (the-village.me) спякотным летнім днём зладзілі пікнік на страсе. Ежай забяспечыў рэкламадаўца, а гутарылі пра мужчын. Ну, калі б яшчэ нам пашчасціла прачытаць развагі трох паспяховых жанчын пра супрацьлеглы пол?

Праўда, рэкламадаўцу трэба актыўна шукаць. Колькасць штатных журналістаў у KYKY роўная колькасці мэнэджэраў па рэкламе: іх па тры. Яшчэ ў камандзе, акрамя рэдактаркі і дырэктаркі, пра якіх ужо пісалася, більд-рэдактар, SMM-шчык, праграміст. І шмат пазаштатных аўтараў.

Некаторыя пішуць усяго адзін артыкул — на тэму, якая іх хвалюе і/ці дзе яны спецыялісты. Некаторыя супрацоўнічаюць з рэдакцыяй рэгулярна. У прынцыпе, стаць аўтарам KYKY можа кожны, галоўнае, каб была цікавая гісторыя, бо, на думку рэдакцыі, ніякая адукацыя не робіць журналістам, толькі практыка.

Калі Вы хочаце ставіць «жывыя» тэксты — не высылайце іх на ўзгадненне. Самі журналісты KYKY, праўда, амаль усе тэксты ўзгадняюць. Але, па словах Сашы Раманавай, варта імкнуцца да такога ўзроўню даверу героя: «вы пасядзелі — і ён упэўнены, што ты напішаш файна». Ну, і не з усімі праўкамі варта пагаджацца. Чалавеку бывае складана ўспрымаць свае словы, надрукаваныя журналістам. На сэлфі ж мы выглядаем не так, як у жыцці, праўда? Таму праўлены тэкст можа «прырасці» канцылярызмамі і літаратурным стылем. Даводзіцца тлумачыць: «Вы ж так не гаворыце на самой справе».

Дарэчы, усе героі Kyky сапраўдныя. Але ці кажуць яны праўду? KYKY — часопіс меркаванняў, таму пытанне не залічваецца.

Пра што мараць і шкадуюць журналісты KYKY?

Яны чакаюць сэкс-шоп! Дакладней, чакаюць, што якая-небудзь крама адпаведнага профілю замовіць у іх натыўную рэкламу. Ужо маюць шмат ідэй ды накідаў, а «Германа ўсё няма»… Ні за адзін тэкст рэдакцыі не сорамна, яна ні пра што не шкадуе. Сумневы ў Сашы Раманавай выклікае хіба ўласны артыкул пра пантавыя ванны. Быццам бы ўсё ж не вельмі гуманны шлях аздараўлення і не трэба было згаджацца яго рэкламаваць, хоць аленяў і не забіваюць. На пытанне “Ці любы прадукт возьмецеся рэкламаваць?» рэдакцыя адказала, што не рэкламуе «рэчы, шкодныя для здароўя, лахатроны і казіно».

Пасля выхада тэкста Марыі Вайтовіч пра патолагаанатамку паступіла просьба ад гераіні прыбраць публікацыю, хаця тэкст быў з ёй да слоўца ўзгоднены. Рэдакцыя адмовіла, і тады гераіня схавала допісы ў сваім Twitter, якія прынеслі ёй вядомасць. Марыя спрабавала высветліць у дзяўчыны, што здарылася, што памяняць у артыкуле, але яна перастала выходзіць на сувязь. «Мне вельмі шкада» — рэзюмавала журналістка.

Шмат пытанняў выклікаў тэкст Ганны Златкоўскай «Аборт — гэта не віна мужчын ці абставінаў. Гэта безадказнасць жанчыны». Пасля халівару ў каментарах рэдакцыя і сама Ганна вырашылі, што артыкул патрабуе дадатковых тлумачэнняў, якія і апублікавалі на пачатку тэкста. Сайт KYKY прынцыпова не «чысціць», нічога не прыбірае, якая б рэакцыя на тэкст ні была.

Статыстыка для тых, хто любіць лічбы:

У жніўні 2017-га на KYKY.org было 53 тысячы рэальных наведвальнікаў штодня. Каля 30% прыйшло з сацсетак. Гэта, як кажа медыяэксперт Паўлюк Быкоўскі, сярэднестатыстычны ўзровень для еўрапейскага СМІ, а ў Беларусі далёка не ўсе яго дасягаюць. 57% аўдыторыі KYKY – мужчыны. Большая частка наведвальнікаў – ва ўзросце ад 25 да 44 год, 5% – пенсіянеры. Амаль увесь трафік арганічны – артыкулы не рэкламуюцца за грошы, толькі зрэдку рэдакцыя робіць платную прамоцыю матэрыялаў у Facebook.

Падзяліцца:

6 кастрычніка 2017 года
Перадрук матэрыялаў press-club.pro магчымы толькі з дазволу рэдакцыі. Падрабязней...
Press Club BelarusМедыякухняРэдакцыя KYKY: Мы чакаем замову на натыўную рэкламу ад сэкс-шопа!

Падпішыся на нашу медыйную рассылку!

Кожны тыдзень атрымлівай на пошту: якасныя магчымасці (гранты, вакансіі, конкурсы, стыпендыі), анонсы івэнтаў (лекцыі, дыскусіі, прэзентацыі, прэс-канферэнцыі) і карысны кантэнт

Падпісваючыся на рассылку, вы згаджаецеся з Палітыкай канфідэнцыйнасці
Мы выкарыстоўваем файлы cookies. Правілы канфідэнцыйнасці
Прыняць