Трэнінг для маладых беларускіх журналістак і журналістаў у Ерэване (дэдлайн працягнуты)

Дэдлайн падачы заявак (абноўлены): 10 верасня 2023 года

Увага: Паколькі Арменія — краіна СНД, у ёй працуе не толькі вышук праз Інтэрпол, але таксама міждзяржаўны вышук у межах СНД. Раім вам узважыць рызыкі і адказна падысці да планавання ўдзелу ў івэнце.

Хто можа падаць заяўку

Семінар адмыслова створаны для пачаткоўцаў, якія жывуць у Беларусі, Грузіі або Арменіі, ва ўзросце паміж 18 і +/- 25 гадамі, якія не маюць досведу ў журналістыцы альбо робяць першыя крокі ў прафесіі і ўжо маюць сваё невялікае кола чытачоў ці гледачоў.

Што чакае ўдзельнікаў

Удзельнікі змогуць пазнаёміцца з асновамі прафесійнай журналістыкі, абмяркуюць кібербяспеку і абарону крыніц, навучацца правяраць факты і выяўляць фэйкавыя навіны, а таксама атрымаюць першае ўяўленне пра Storytelling.

Кантэкст

Пасля падзей жніўня 2020 года сітуацыя для вольнай прэсы ў Беларусі прынцыпова змянілася. Шмат прафесіяналаў з’ехала з Беларусі і працуюць з трэціх краін. Калегам, якія застаюцца ў краіне, даводзіцца працаваць у складаных умовах і з высокай рызыкай. Гэты семінар прызначаны для гэтых дзвюх груп.

Умовы правядзення семінара

Удзельнікам, якія прыбываюць з Беларусі, арганізатары аплочваюць праезд і пражыванне. Усе ўдзельнікі /ўдзельніцы атрымаюць кішэнныя грошы і сілкаванне. Абавязковай умовай для пакрыцця выдаткаў і кішэнных грошай зʼяўляецца наведанне ўсіх дзён семінара.

Кантактавая асоба: Жанна Кромер, e-mail: ja@kroemer.link

Як падаць заяўку

Калі ласка, запоўніце форму па спасылцы.

Звярніце ўвагу: у форме заявы арганізатары задаюць пытанні пра вашыя навыкі і веды, але гэта не зʼяўляецца вырашальным фактарам пры адборы. Гэтая інфармацыя дапаможа скласці праграму семінара, каб яна як мага лепей адпавядала вашым патрэбам.

---