Як расказваць дрэнныя навіны? Парады з Wisła Video Forum

Photo by Clément Falize on Unsplash

Прыклад дрэннай падачы

Сюжэт пра засуху ў Афрыцы выпусціла інфармагенцтва Associated Press паўгода таму. Ён называецца так: «Мільёны людзей на поўдні Афрыкі галадаюць з-за засухі». І канешне, гэта катастрофа. Але чамусьці ў гэтым сюжеце яна дзіўным чынам пакідае нас цалкам абыякавымі.

«Гэта жудасны спосаб распавесці гісторыю, – кажа Джэрэмі. – Спачатку мы бачым нейкія фрагменты [раслін], якія быццам бы павінны паказаць, што такое засуха, дэфіцыт вады і праблемы з аховай здароўя. Але апавядання, самой гісторыі, там няма ўвогуле». Ёсць толькі сумныя і павольныя карцінкі спачатку, а потым нейкі іншы чалавек, а не той, каго закранула гэтая праблема, кажа нам, што адбываецца.

Атрымліваецца, што мільёны людзей галадаюць, але гледачам усё роўна. І гэта не праблема гледачоў. Гэта проста дрэнная журналістыка, якая мусіць сысці ў мінулае.

Як правільна распавядаць гісторыю

Джэрэмі Скіт называе пяць прынцыпаў, пра якія варта памятаць, калі паведамляеш дрэнныя навіны:

1. Будзьце сумленнымі. Не трэба перабольшваць ці палягчаць праўду. Кажыце як ёсць.
2. Сюжэт пра дрэнныя навіны не павінен быць занадта доўгім і павольным (як ў гэтым прыкладзе). Асабліва, калі вы звяртаецеся да людзей, якія даўно жывуць з гэтымі праблемамі. Яны і так ведаюць, што справы кепскія, не трэба расцягваць інфармацыю.
3. Кажыце ясна, не выкарыстоўвайце занадта складаныя словы.
4. Праяўляйце эмпатыю. Хаця доўгія гады было прынята думаць, што гэтага рабіць не трэба.
5. Будзьце часткай гісторыі. Пакажыце, як вы бачыце і разумееце гэтую дрэнную навіну.

Гэта не значыць, што трэба накручваць аўдыторыю ці маніпуляваць ёю.

Але падумайце, як бы вы расказалі пра гэтыя дрэнныя навіны сваёй маці, калі б гэта было непазбежна. Напэўна вы казалі б шчыра і проста, без залішне высокага стылю або навукападобнасці. І, вядома, спачувалі б ёй і не хавалі гэтага.

Сторытэлінг – самае важнае

«Гэта галоўнае, што я засвоіў за сваю 30-гадовую кар’еру», – кажа Джэрэмі. Мы быццам бы ўсё разумеем пра журналістыку і інфаповады, але часам проста забываемся пра ўменне зачапіць і ўтрымаць увагу глядачоў.

Сёння каманда, якая працуе над TikTok-акаўнтам сусветнай службы BBC траціць 80% часу на абдумванне першых дзвюх (!) секунд роліка.

Вось якія ў іх правілы працы з TikTok:

• Загаловак – сутнасць гісторыі. Перш за ўсё ён патрэбен, каб вы самі разумелі, пра што ваш сюжэт, і не блыталі гледачоў.
• Першыя дзве секунды – найважнейшыя.
• Мантаж павінен быць надзвычай хуткім; дадавайце візуал, які тлумачыць тэкст.
• Падзел экрана на дзве часткі – добрая ідэя.
• Чалавек у кадры таксама павінен казаць вельмі хутка.
• Важна ведаць тэндэнцыі платформы. Калі ўсе трымаюць мікрафон нейкім вызначаным спосабам, значыць, і вам варта так рабіць.
• Вядучы – адлюстраванне аўдыторыі, якая вам патрэбна.

Цалкам тэкст пра тое, як рабіць цікавыя навіны чытайце на сайце  «Солі»